Poetry Archives - Page 19 of 25

Feet War Made Fer Waakin

Articles, Creative Writing, Environment, Satire and Humour No Responses »

Nov 112011

By Bob Smith.

A’ve waakit up ower Bennachie
Fae Mither Tap hae seen the view
A’ve suntered up the Brimmond Hill
In rain an fin skies war blue

A’ve dannered in bonnie kwintraside
Strode on a Schiehallion ridge
A’ve wannered throwe the Lairig Ghru
Fae Linn o Dee ti Coylumbridge

A’ve climmed up throwe the boulders
Ti win ti the tap o Lochnagar
A’ve aye been affa lucky
Fae the tap a’ve seen afar

A’ve rambled fae Loch Muick
Ti Glen Clova past Glendoll
A’ve dauchled near the Grey Mare’s Tail
Ti see the watterfall

A’ve gin throwe glens an valleys
Each his its ain beauty
A’ve stravaiged aa ower Perthshire
Near Loch Tay at Achnafree

A’ve traversed the slopes o Cloch-na-ben
An seen boulders as big’s ma hoose
The only thing a hinna seen yet
Is the kwintraside aroon Glen Luce

A’ve been on the tap o Peter’s Hill
Fin ye cwidna see fer fog
A’ve been on waaks fit war easy
An some they war a fair slog

Throwe the glen o the River Tanar
A’ve cam ti the slopes o Mount Keen
The walk ti git ti the boddom
Fair keeps ye baith fit an lean

The win his blawn throwe ma hair
The rain his made ma weet
A enjoyed every meenit o’it
Tho noo an agin a hid sair feet.

©Bob Smith “The Poetry Mannie”
Image credit: © Maxim Tupikov | Dreamstime.com

Poetic Justice

Aberdeen City, Articles, Community, Creative Writing, Featured, Information No Responses »

Nov 042011

With thanks to Aberdeen Amnesty International chair Gail Riekie.

The Aberdeen Amnesty International Group will launch ‘Poetic Justice’, their newly published collection of poems on the theme of human rights, at the John Skinner Centre on Thursday 10th November 7:30 – 9:30 pm.

The evening will feature readings of the poems by their authors, live music and a bar. The collection ‘Poetic Justice’ will be available for sale for £5.
Entry is free – donations to Amnesty welcome.

The idea for a collection of poetry sprang from the Aberdeen Group’s desire to do something special this year to celebrate the 50th Anniversary of the founding of Amnesty International.

They also wanted to honour two local activists, John and Daphna Williams, who both died in the last two years. ‘Poetic Justice’ is dedicated to the memory of this remarkable couple.

The poems in the collection were written, mostly by NE Scotland poets, in response to a competition that the Aberdeen Amnesty group held earlier in the year. Olivia Farrington, the group’s Burma co-ordinator, organised the competition. The poems cover a broad range of topics and themes, from the Highland Clearances to modern day Baghdad, and from meditations on liberty to experiences of manning an Amnesty stall in the Bon Accord shopping centre.

Aberdeen Amnesty Chair Gail Riekie said:

“I am absolutely delighted with the way this project has turned out. Aberdeen’s poets have done us proud. The collection would make a beautiful and though provoking seasonal gift!”

Contact Aberdeen Amnesty International via our email aberdeengroup@amnesty.org.uk to order a copy of ‘Poetic Justice’.

See also the group’s website: www.aberdeen.amnesty.org.uk

Heids In The Sand

Aberdeen City, Articles, Community, Creative Writing, Environment, Information, Opinion, Satire and Humour No Responses »

Oct 282011

By Bob Smith.

If ye gyang doon near the seashore
An hae a look aa ower the land
Ye’ll see a fyow fowk’s erses
Cos their heids are beerit in sand

Noo tryin ti hae conversation
Wi a backside is nae quite right
As fit cums oot o erses
Is usually a heap o’ shite

They beery their heids fer a reason
So they dinna the truth hae ti hear
If they canna listen ti fit ithers say
They think they’ve nithin ti fear

The next fyow verses’ll tell ye
Aa aboot fowk faa beery their heids
They think the warld owes them a livin
They’re nae responsible fer their deeds

“Nae use my car sae often?
Gweedness me!! An snakes alive
If aa hiv ti git a carton o milk
I need ti be able ti drive”

“Dinna use planes sae afen yer sayin?
Iss surely jist canna be
Use trains an buses fin ye can?
Na! Na! I really maun flee”

“Dinna spend if ye dinna hae till?
Its ma siller, I’ll dee fit I wint !!
In fact I’ll use aa ma credit cards
Until a’m bliddy weel skint”

“Noo hud on ma mannie” they shout
“I’m away back doon ti the sand”
So fin ye see their erses stickin up
Jist gie them skelp wi yer hand

© Bob Smith “The Poetry Mannie” 2011
Image credit: © Adisak Soon | Dreamstime.com

A Paper In Denial

Aberdeen City, Aberdeenshire, Articles, Community, Creative Writing, Information, Opinion, Satire and Humour No Responses »

Oct 212011

By Bob Smith.

A’ve bin haen an e-mail natter
Wi a mannie fae the P&J
Aboot their lack o recogneetion
Fer the film aboot the Menie affray

Nae meention o it’s Scottish premiere
Fit wye? A thocht a wid speir
“You’ve Been Trumped” is a success
The P&J winna mak iss clear

Na Na, the chiel wisna haen iss
The paper hid scriven some spiel
On mony occasions said the mannie
He must think a’m bliddy feel !!

I syne askit plain an ti the pint
Dates please faan iss wis printed
The chiel widna say nae mair
So a didna git fit a wintit

Noo the craitur wis maist pit oot
Fer hintin they war Trumpie’s freen
Maybe if the mannie hid ‘s wye
A’d be run oot o Aiberdeen

A’ve aywis thocht a newspaper
Wis supposed ti report the news
Tho aboot “You’ve Been Trumped”
We’ll nivver read the P&J’s views

©Bob Smith “The Poetry Mannie” 2011
Image Credit: © Guy Shapira | Dreamstime.com

Memories O Jimmy’s Cafe

Aberdeen City, Articles, Community, Creative Writing, History, Information, Opinion, Satire and Humour No Responses »

Oct 132011

By Bob Smith.

A weel myn o Jimmy’s Cafe
‘Twis a placie in John Street
Faar fowk fae aa waaks o life
Fer denner they wid meet

There wis larry an van drivers
Quines fae local shops
Office loons jist like me
Wifies faa war Mrs Mops

Nae falderals an funcy decor
Jist plain wa’s o pinted plaster
If ye winted fite tablecloths
Ye war in for a stammygaster

It wis maistly widden tables
Aa covered wi a gweed ile cloth
Iss wis affa easily wippit ower
If ye happen’t ti spill yer broth

Doon a step wis anither roomie
Ye wint if the placie wis pakkit
Wi lang widden tables an benches
On fit fowk’s doups war parkit

Halesome maet wis aye served up
Mince an tatties wi a mealie puddin
Or fine stew wi a doughball or twa
As fowk throwe the door war floodin

Fer puddin ye aye hid a choice
Custard wi aipples or a tart
Ice cream an fine jeely as weel
Fegs ye didna ken far ti start

Nooadays wi iss health an safety
Jimmy’s micht nae hiv passed the test
Bit at servin up gweed tastin fare
Jimmy’s Cafe wis amang the best

©Bob Smith “The Poetry Mannie” 2011

Walton’s Nae Wiltin

Aberdeen City, Aberdeenshire, Articles, Community, Creative Writing, Information, Opinion, Satire and Humour No Responses »

Sep 302011

By Bob Smith.

Eence mair oor local “daily”
His cum up wi mair shite
“Is iss Scotland’s maist hated mannie?”
On their front page they did write

A cos a chiel stood his grun
An ti ridicule widna gie in
So some sneaky journalist buggers
Thocht the knife they wid stik in

A puckle fowk they wrote letters
An ti the editor fair pynted oot
They hid nae truck wi hatred
Ower the opposin o the AWPR route

Some 91% o us are supposed ti be
Agin Road Sense an their palaivers
Na Na, it’s 91% o five hunner an een
Faa’s opinion they did favour

Ti the P&J iss winna maitter
Iss wee bit slip o the quill
As lang as Wullie Walton bides hated
An thochts o Road Sense they are ill

The Daily Record an apology gied
Ti Neil Lennon an Celtic FC
Fer usin wirds like “hated”
Allied ti Rangers fecht wi HMRC

Noo jist fit is the difference
Fowk wid hae the richt ti ask
“Hated” wis used in baith spiels
Yet only ae paper wis teen ti task

©Bob Smith “The Poetry Mannie” 2011
Image credit: © Axel Drosta | Dreamstime.com

Stan Up An Be Coontit

Aberdeen City, Aberdeenshire, Articles, Community, Creative Writing, Environment, Information, Opinion, Satire and Humour No Responses »

Sep 232011

By Bob Smith.

Ye maun stan up an be coontit
Abeen the parapet stik yer heid
Mak sure ye’re heard lood an clear
Or democracy micht seen be deid

Noo fin ye stan an protest
Ye’ll be ca’ed a sorts o names
By fowk faa’ve ither motives
An play devious sorts o games

In Aiberdeen yer a nimby
Fer haen a pint o view
Aboot the route o the AWPR
Tho’ some lifestyles it’ll screw

Dinna think bad o The Donald
Ye’ll be ca’ed a progress stopper
E’en tho a richt gweed SSSI
His o coorse noo cum a cropper

Raisin the gairdens at Union Terrace
Cwid lan oor cooncil in penury
Ach nivver myn we’ll be consoled
Being brocht inti iss new century

The third brig ower the River Don
Noo iss cwid cause some grief
Ti the gweed fowk aroon Tillydrone
Seems they shudna be alloo’d ti “beef”

Folkies dinna wint a deer cull
Ower the wye o Tullos Hill
The cooncil says usin tree sleeves
We’ll aa hae ti fit the bill

We’re aye bein telt ower an ower
Protests div oor economy strangle
Nae concrete figures ti back iss up
As mair plans they try ti wangle

Showin Aiberdeen’s open fer business
Am fair tired o hearin iss spik
As tho we’re a bliddy wee shoppie
Fit’s in danger o closin next wikk

Noo a wird ti aa the gadgies
Faa dinna like fowk ti protest
Awa an bide “ooner the thoom”
O eens faa wid line their nest

Mair names a’ll nae doot be ca’ed
An some flak a micht hae ti tak
Fer askin aa maist ordinary fowk
Ti stan up an jist fecht back

©Bob Smith “The Poetry Mannie” 2011

Shop Till Ye Drap

Aberdeen City, Aberdeenshire, Articles, Community, Creative Writing, Environment, Information, Opinion, Satire and Humour No Responses »

Sep 162011

By Bob Smith.

The fitfa’s up in yon Union Square
Aboot iss news I dinna really care
Wi material wealth I’ll hae nae truck
Fae me thae malls winna mak a faist buck

Tho’ fowk can spend ony wye they wint
At times a think their brains hiv got tint
Fair fleein aboot fae here ti there
Iss lemming like steer is hard ti square

Shoppies are placies I dinna like ti dally
So’s aa their spiel I dinna hae ti swally
A buy fit a wint then oot the door
Syne “faar ye gyaan” ma wife’ll roar

Some fowk o coorse wid bide aa day
Gyaan in blonde an cumin oot grey
They’re in the malls for aat lang
Peerin at windas throwe the thrang

Fashions noo are fair aa the rage
Ye maun hae the richt gear fitivver yer age
Wifies in ticht troosers wi erses richt fat
Some mannies ye winner fit the hell they’re at

Shoptill ye drap iss aa the malls cry
Even thingies nae nott they wint ye ti buy
Jist shove it aa on ti aat wee plastic card
Hiv some fowk’s brains aa turned ti lard?

Shoppin it wid seem is a national obsession
It’s aa aboot spendin an gettin possession
O as muckle stuff yer hairt dis desire
Afore oot yer body yer last breath dis expire

Aa the stuff fit ye’ve githered
Efter the money ye’ve shelled oot
A doot eence yer deid an beeriet
A fair puckle micht be chucked oot

A Box On Fower Wheels

Aberdeen City, Aberdeenshire, Articles, Community, Environment, Information, Opinion, Satire and Humour No Responses »

Sep 092011

By Bob Smith.

Noo the AWPR,
Jist a ribbon o tar
Is bein built so fowk can gyang faister
Fae Stoney ti Dyce,
27 minutes they’ll slice
Aff the time on the clock fit’s oor maister

We maun get there quick,
Some spoot oot real slick
Time is money ye surely can see
Some steerin wheel huggers,
Are aa silly buggers
Fleein aroon fae the Don ti the Dee

We’ve aa heard the notion,
Aboot time an motion
Far fowk staun an peer at watch face
Ti see fit wye’s quicker,
Ti damage yer ticker
As fowk jine the bliddy rat race

The warld his geen mad,
Iss is affa sad
In a car some growe horns an a tail
Wi great bulgin een,
Rude signs ti be gien
Feenished aff wi a rant an a rail

Time ti slow doon,
Dee awa wi the froon
Live life at a less frantic pace
If ye maun drive yer car,
Ower iss ribbon o tar
Hae an attitude fit’s less “in yer face”

Een o life’s sins ,
Nae hae use fer yer pins
Can ye think o onything sadder
So git on yer bike,
Or gyang fer a hike
Or ye micht slither aboot like an adder

Some tak things ower far,
An worship the car
Car showrooms are noo the new kirks
Div the salesmen aa kneel,
At the eyn o each deal
Syne waak aboot wi satisfied smirks

A micht tak the piss,
Bit jist think o iss
A car’s only a box on fower wheels
We’re layin doon a tar bed,
Ti tak a muckle tyre tread
Costin millions o poonds-we’re aa feels

Decorum

Aberdeenshire, Articles, Community, Creative Writing, Information, Opinion, Satire and Humour No Responses »

Sep 012011

By Bob Smith.

Fin walkin doon the fairway
T’wis jist a fyow days syne
A gowfin freen he did declare
Decorum’s noo in decline

Decency an gweed mainners
Are less aften ti be seen
Be it in oor aingranite city
Or awa doon in Gretna Green

Nae decorum in oor dress sense
Some fowk they look like tramps
Faa hiv bin draggit backwyse
Throwe the funns ower in the Gramps

Young chiels in torn troosers
Some quines dressed like tarts
Ample bosoms are on show
Even eens o some auld farts

A lot o skyrie heids ye see
In orange, mauve or pink
Some fowk try their best ti be
A maist orra bliddy tink

TV soaps they dinna help
Fowk aye bawlin an yellin
Faa’s shackin up wi faa
Ye’ve gey difficulty in tellin

Young bairns ye aften hear
Lit oot an oath or twa
Div they learn iss in the nursery
Or fae their ma or da

Car drivers hiv nae mainners
As they drive aroon oor roads
Wi road rage aa aboot ye
O twa fingers ye see load

At maist fitba matches nooadays
Fae the stands they hurl abuse
Fin a player he maks a bad pass
Fans dinna tolerate ony excuse

Am nae sayin things war perfect
Fin ma freens an I war loons
Bit we didna ging aroon actin
Like a bunch o bliddy goons

So let’s hae some mair decorum
As we gyang aboot oor chores
Even jist sayin a thank ye
Fin a bodie huds open doors

Listen ti anithers pint o view
Withoot aye snarlin “yer wrang”
Decorum ye see costs nithing
We need decency afore ower lang

Older Entries Newer Entries