Stan Up An Be Coontit

Aberdeen City, Aberdeenshire, Articles, Community, Creative Writing, Environment, Information, Opinion, Satire and Humour

Sep 232011

By Bob Smith.

Ye maun stan up an be coontit
Abeen the parapet stik yer heid
Mak sure ye’re heard lood an clear
Or democracy micht seen be deid

Noo fin ye stan an protest
Ye’ll be ca’ed a sorts o names
By fowk faa’ve ither motives
An play devious sorts o games

In Aiberdeen yer a nimby
Fer haen a pint o view
Aboot the route o the AWPR
Tho’ some lifestyles it’ll screw

Dinna think bad o The Donald
Ye’ll be ca’ed a progress stopper
E’en tho a richt gweed SSSI
His o coorse noo cum a cropper

Raisin the gairdens at Union Terrace
Cwid lan oor cooncil in penury
Ach nivver myn we’ll be consoled
Being brocht inti iss new century

The third brig ower the River Don
Noo iss cwid cause some grief
Ti the gweed fowk aroon Tillydrone
Seems they shudna be alloo’d ti “beef”

Folkies dinna wint a deer cull
Ower the wye o Tullos Hill
The cooncil says usin tree sleeves
We’ll aa hae ti fit the bill

We’re aye bein telt ower an ower
Protests div oor economy strangle
Nae concrete figures ti back iss up
As mair plans they try ti wangle

Showin Aiberdeen’s open fer business
Am fair tired o hearin iss spik
As tho we’re a bliddy wee shoppie
Fit’s in danger o closin next wikk

Noo a wird ti aa the gadgies
Faa dinna like fowk ti protest
Awa an bide “ooner the thoom”
O eens faa wid line their nest

Mair names a’ll nae doot be ca’ed
An some flak a micht hae ti tak
Fer askin aa maist ordinary fowk
Ti stan up an jist fecht back