Scottish fitba’s noo dire,
it’s stuck in the mire
It’ll hae a richt fecht ti survive
Cos o the cost,
mair fans they are lost
As T.V shows games fit are live
Faar’s aa the flair,
excitement’s nae mair
As coaches use a rigid formation
Aa 4-5-1 noo,
or thon 4-4-2
An fans gie vent ti frustration
Faar’s aa the wingers,
faa o crosses war slingers
They’re nae langer seen in the game
Jist a lot o fly guys,
faa are gweed at a dive
Each wikk it’s jist mair o the same
There’s nae Graham Leggat,
faa hid fullbacks fair fleggit
As doon the touchline he wid glide
Wi his quick feet,
maist opponents he beat
An they landed up on their backside
Modern players micht be fit,
bit the fitba is shit
Gweed goal poachers we nivver div see
Wi twa banks o fower,
it maks ye fair glower
Fan fae shackles wull fitba be free ?
Fae pundits we hear,
an aa iss I fear
Is ae reason oor fitba’s nae fine
“We’re in the results game”,
is fit they proclaim
Entertainment is far fae their myn
In Europe we fail,
the fans they aa wail
As heids they’re hung doon in shame
Jist hae players attack,
an nae jist hing back
An bring alive “The Beautiful Game”
©Bob Smith “The Poetry Mannie”
Image credit: © Shaun Mclean | Dreamstime.com
