Jul 012011
 

By Bob Smith.

Hiv ye heard o the fairy tale
Fit’s telt bi oor local press
Faa boast they report aa local news?
A richt fable ye maun confess

An award winnin film ‘You’ve Been Trumped’
Ti a full picter hoose it played
Nivver a wird in the P&J
Nae EE heidlines iss made

Noo it wis the Scottish premier
O the story aboot fowk at Menie
Ye wid hae thocht iss warranted
A scrawl fae a journalist’s penie

Can ye tell fact fae fiction
Fan oor local press div print?
Stories aboot gyaan’s on at Menie
Ah’m feart the truth gits tint

Noo Trump flees in on private jet
Aa ower their front page it’s splashed
Yet aboot harassment o the Menie fowk
They’re nae aat bliddy fashed

Maybe o coorse oor local press
Ti print some stories they’re nae able
Jist in case they fin theirsels
Banished fae Trump’s tap table.

©Bob Smith “The Poetry Mannie” 2011

 

Jun 242011
 

 By Bob Smith.

A fence it his bin biggit
Aroon David Milne’s wee hoose
Trump the bully boy is back
Tryin hard ti tichen the noose

Haaf the cost o iss fencie
He wints pyed bi David Milne
Faa says “awa ye go min”
Yer bank balance we’ll nae fill

A garage wa he wints teen doon
It’s on ma lan Trump says
Bit David he his nae doots
The bliddy wa it stays

Noo Trumpie he disna like it
Fin fowk dinna dee his biddin
Michael Forbes stuck twa fingers up
An winna tidy his so ca’ed “midden”

At PR wark Trump’s nae eese
He kittles a fair fyow locals
Aye treatin fowk wi disdain
As tho’ they’re kintra yokels

O coorse Trump’s o aat breed
Faa see themsels as go getters
It’s time ti tell him ti —- aff
The missin wird his fower letters

© Bob Smith “The Poetry Mannie” 2011

Note:  Voice’s ‘poetry mannie’ Bob Smith reviews ‘You’ve Been Trumped’ in Scottish Review – click here( See ‘The cafe 2’ column. )