By Bob Smith.
|
I weel myn o the hairst time The chatter o the binder blades Wi shaifs o corn aneath each airm |
Fin the stooks war ready I myn o faither biggin’ rukks I ken the combine it is faister |
©Bob Smith “The Poetry Mannie” 2012
Image Credit © Elaine Andrews
Faa’s at bawlin an greetin
Oot ower a UTG balustrade?
It’s Sir Ian an aa his cohorts
Faa hiv aa iss wailin made
The cooncillors are aa numpties
The Freens o UTG are as weel
Fer nae littin the ACSEF lot
Git awa wi iss dodgy deal
Aiberdeen’s nae a bonnie place
Says yon Dutchman Leo Koot
He’ll be up stakes an leavin
An “TAQA” wi him nae doot
Wee Stewartie wis fair fizzin
His phizog wid hae turn’t milk soor
Tam Smith he’ll be jinin in
In fair kickin up a stoor
Mike Shepherd o Freens o UTG
Wull be weerin a smile richt big
An aa the fowk faa helpit him
Wull be deein an Aiberdeen Jig
Noo we’ll hae tae git crackin
Wi a better scheme fer UTG
An bring the gairdens up tae scratch
So’s the green oasis we’ll still see
©Bob Smith “The Poetry Mannie” 2012
Noo a hunner business billies
Faa support City Gairdens Trust
Tae destroy Union Terrace Gairdens
They aa think iss is a must
They’re aa the usual suspects
Faa stan tae mak a killin
An ding doon ony cooncillor
Faa disna show ony willin
Ye hiv the likes o Martin Gilbert
Twa Stewarties, Milne an Spence
An woe betide ony business chiel
Faa micht sit upon the fence
A letter tae oor toon council
Wis sint wingin on its wye
If ye vote agin the plans
We micht hing ye oot tae dry
Think o the bigger picter here
Is their affa mournfu plea
An Sir Ian he’ll jist waak awa
If oor biddin ye dinna dee
Their PR machine is gearin up
Wi helpfu freens at the P&J
Faa canna say onything naistie
Advertisin revenue cums intae play
Fit richt hiv aa thae buggers
Tae tell us fit’s best fer oor toon?
An try tae dictate tae oor council
Fit they can or canna vote doon
We wull sin fin oot fit’s fit
The cooncil’s back is tae the wa
Can they haud faist agin the critics
An a hunner “snipers” an aa an aa?
© Bob Smith “The PoetryMannie” 2012
The warld’s noo an affa place
Is the spik ye fyles div hear
The planet itsel’s nae tae blame
Jist some fowk fa’s on’t a fear
Oor warld’s there tae be enjoyed
It’s faar aabody’s born and bred
It keeps us aa fed an wattered
In Aiberdeen or aroon the Med
Heich snaw capped muntins
Faar ower valleys ye can look
In clear an crystal rivers
Brave fowk can hae a dook
There’s buttercups an ither flooers
In leys aa ower oor sphere
Wild animals an bonnie birdies
As weel as aa kines o deer
Noo aathing’s nae hunky dory
Aat a div ken richt weel
We hiv a puckle greedy fowk
Fa tell lees or try tae steal
Politicians and bunker chiels
They fair div tap ma list
An bliddy big business diddy men
Fa only wint tae full their kist
Tak nae heed o sic buggers
There are fowk far mair genteel
Fa dee a lot o unsung gweed
An dinna parley wi the deil
Lit’s here it for iss warld o oors
An the gweed fowk on iss planet
Ignore the Trumps an their like
Listen tae yer auld Auntie Janet
© Bob Smith “The Poetry Mannie” 2012
Image Credit: Beautiful Alps © Hwee Fuan Tey | Dreamstime.com
The mannie Trump a Dons fan?
Gweed sakes an michty me
If he turns up at a match
Wull the bugger git in free
Trump No 1 wis on the shirt
T’wis presintit by Dod Yule
A suppose noo we’ll likely see
Trumpie’s lackies haen a drool
Foo muckle mair hiv we tae thole
O iss fawnin an forelock tuggin
Bi some Aiberdeen business chiels
Noo a fin iss maist affa buggin
The new fitba pitch at Loirston
Micht be Trump International Stadium
The mannie wid be mair at hame
As a comic at the London Palladium
“Cum on ye Trumps” cwid be the cry
If the billie buys ower oor club
Iss thocht wid gie ma nichtmares
Ma season ticket a wid hae tae scrub
Fit a lot o bliddy nonsense
A hear the AV readers cryin
Jist myn far ye read it first
If Trumpie he cums a-buyin
©Bob Smith “ The Poetry Mannie” 2012
I dinna myn a bittie rain
It fresh’ns aathing up
A haill month’s rain in a day
Fyles noo is bein dumped
Watter rins doon the streets
Drains canna tak the strain
Ony mair sic wachty shooers
Watter’s gurglin back oot again
Flooers are lookin drookit
Heids low wi the wecht
Wi aa the watter fae the sky
The bird bath sees nae fecht
Birdies look a bit bedraiglt
They’re hidin in the trees
Waitin for the sun tae shine
An feathers dry in the breeze
Fin the sun braks throwe again
An stame rises fae the grun
Kids’ll splash throwe the puddles
They’ll be haein lots o fun
Nae doot the morn wull be fine
Birds aa wull tweet and trill
Next wikk o coorse it’ll be pissin doon
O rain maist fowk hiv hid their fill
©Bob Smith “The Poetry Mannie” 2012
Image Credit: SKY MOUNTAIN 1 © Alexandru Mitrea | Dreamstime.com
The SFA are fair in the mire
Aa their efforts micht nae transpire
Tae keep the Rangers fae crashin doon
An playin the likes o the fine “Blue toon”
SFL clubs said on yer bike
We’ve nivver ivver seen the like
Construction o leagues wis yer thocht
Bit us chiels can nae bi bocht
Bigger leagues we micht wint tae see
Bit at a time fin the vote’s mair free
An nae presentin like a bliddy bribe
Tae save the Licht Bues an their tribe
Some SPL clubs noo are wailin
Are feart aboot financial failin
Efter SFL clubs ca’ed their bluff
Een or twa hiv teen the huff
The SFA are a bunch o wallies
Wi the SPL are great pallies
Fans care a lot aboot fair play
An think the SFA ken SFA
©Bob Smith “The Poetry Mannie” 2012
Are ye an optimist or pessimist?
Foo dis yer brain aye think?
Hiv ye a maist positive naitur?
Or is negativity yer faavrit drink?
Is yer warld noo a waefu place?
Is Armageddon jist ower the hill?
Or is there sunshine in yer life?
An iverry day it fits the bill?
Div ye worry aboot the future?
Or tak ilka day as it cums?
Are dark cloods aye githerin?
His yer face a dose o “the glums”?
Is yer gless aye haaf teem?
Or is yer gless haaf fu?
Hiv ye a happy ootlook?
Or are ye doon in the moo?
Tak a wee bittie time fowks
Jist ti see fit wye ye lean
Is laachter aye yer brither?
Or is gloomy foo yer seen?
Turn yer face ti the sun
An shadows ahint ye faa
So says a Maori proverb
A thocht maist affa braw
So brichten up yer daily life
Think naething is a chore
Pit pessimism in the bin
Lit positivity oot ye roar
©Bob Smith “The Poetry Mannie” 2012
Image Credit: © Steve Alvarez | Dreamstime.com
By Bob Smith.
| Bunkers noo are in the shit Some fair div tak the mick Is yer bunker a couthie chiel Or jist anither greedy prick . Parliament nae langer kens fit’s fit Tap bunkers noo rule the roost Weel o coorse we aa div ken Their bunk balances aa git a boost . Lots o siller as a bonus is gien Ti cyards faa appruved the cheatin Time ti kick them faar it hurts Nivver myn their bliddy greetin |
Time we hid mair local bunks Faar ye tauk ti a human face Nae aye hingin on the phone Ti be telt yer in seventh place . Shut doon the stock exchange Gie investors back their cash Crooked traders in “the City” Wid see their empires crash . Stop the swickin aa ower the lan It’s time tae git aff oor hunkers An tell the bobbies far ti pit Thae bunch o bad, mad bunkers |
©Bob Smith “The Poetry Mannie” 2012
Image Credit: HOLIDAY WITH MONEY© Andy Brown | Dreamstime.com
By Bob Smith.
| O Scotland ma Scotland Iss lan o ma birth Yer beauty astounds ma Be it muntin or firth . Yer bonnie glens are quairt Fair rushin are yer burns Lazy are some rivers Wi their twists an turns . Yer moods they can be varied Fyles gey roch an weet Afen saft an gintle Like an ivver luvin geet |
A mervel at yer wildlife As fin the eagle soars A watch the seals an wadin birds As a dander alang yer shores . Yer winters can be affa bleak Grun happit wi ice an snaw Bit in simmertime fooivver There is a magic fit is braw . A luv life here in Scotia Noo lit there be nae doot O her beauty an her grandeur A wull forivver spoot |
© Bob Smith “The Poetry Mannie” 2012
Image credit: HIGHLAND COW © Adrian Jones | Dreamstime.com