Jun 142013

By Bob Smith.

Trumpie’s jaws are in overdrive
Sayin the economy o Aiberdeen
Is aa doon tae him biggin
The greatest gowf course ivver seen
Gweed sakes fit an affa chiel
As a blaw he’ll nivver be beat
Expectin aa the fowk listenin
Tae drap doon an kiss his feet
A wunner fit thrivin business fowk
Think o aa Trumpie’s blether
Some must be teerin their hair
Ithers near the eyn o their tether
Trump ignores  the efforts o
The billies livin in oor toon
Faa biggit up oor economy
Lang afore iss bliddy goon
Trump his got a new award
Fae sum American Academy
Fit ye shud a ken is iss
The Donald’s a main trustee
The chiel is off’rin an olive brunch
Tae Wee Eck as a token o peace
Iss symbol it is lang derived
Fae the customs o Ancient Greece
Iss offer his git strings attached
The bay windfairm it maun go
Else Trump’ll nae bigg his hotel
An hoose biggin wull be slow
Tae be pals eence again
Trump maun git his ain wye
The SNP billies are expectit
Tae eat bliddy humble pie
Wull Eck stretch oot his airms
Sayin, “Donald, lit’s hae a cuddle
A’ll move the turbines far awa
An sort oot iss affa muddle”
Wee Eck micht be mony things
Bit he’s nae aat bliddy daft
He kens he’d lose mony votes
As independence he tries tae craft
So Donald yer in a quandry
Tae bigg or nae tae bigg
Fitivver ye decide tae dee
Ye’ll aye be thocht a prig
Bob Smith “The Poetry Mannie” 2013
  • Comments enabled – see comments box below. Note, all comments will be moderated.

 Leave a Reply

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>