By Bob Smith.
I’m aul aneuch ti myn the time
Fin in a clean toon we did bide
Aboot pavements an shop fronts
Local fowk they took great pride
Shopkeepers wi bucket an mop
They kept the place richt bonnie
Sad ti say o sic carin fowk
Ye dinna noo see aat mony
Washin doon their winda gless
So’s fowk cwid see their wares
Be it floorie baps an funcy pieces
Or polished aipples an sweet pears
There’s nae shops o aat kine
In oor main street ony mair
Jist phone shops an coffee shops
Union Street his lost its flair
Greedy landlords hikin up the rent
Hiv seen local shops in demise
Multi nationals and finance shops
They are fair noo on the rise
Aboot 80% o their takins
Gyangs awa oot o iss city
Shareholders aa ower the country
Are smilin mairs the pity
Shoppers noo jist hae a thocht
Fin next ye spend yer cash
It’s nae aa bidin in the toon
Wi local shops we’re nae awash
Union Street is fair sufferin
O aat there is nae doot
Supermarkets and shoppin malls
They’re takin aa the loot
The fate o oor local economy
Is in the hauns o us aa
Support the local shoppies
Afore they gyang ti the wa
Ti mak oor toon spik an span
Wi hiv ti chynge the trends
O spittin oot oor chuddy
Or chukkin doon fag ends
©Bob Smith “The Poetry Mannie” 2011
Comments enabled – see comments box below. Note, all comments will be moderated.