Murdoch’s Muppets

Yon Murdoch mannie’s nae happy
In fact he’s jist fair pit oot
The NOTW accused o hackin phones
An pyein oor bobbies aff wi loot

Papers fer some mony ears
Hiv hid ower muckle swye
Politicians aa feart ti act
In case they’re hung oot ti dry

The investigative journalist hack
We still o coorse div need
Bit nae the type faa brak the rules
Jist ti satisfy Murdoch’s greed

Noo fowk faa bocht his papers
Some class  a Murdoch Muppet
An aa helpit prop up his empire
Oot his brose bowl they hiv suppit

Lit’s nae forget oor local lot
Faa git up ti aa sorts o capers
As promoters o  yon Donald Trump
Losh he’s nivver oot their papers 

The P&J shud bi worried
If its practices are reviewed
Ower lang its hid a monopoly
Gweed fowk’s views are screwed

Fae Lowrenkirk ti Lerwick
An ower wast ti Stornoway
The daily fit rules the roost?
It’s the bliddy P&J

It’s nae eese noo girnin
Ti thon lot at thePCC
We need fowk fa are independent
An fae press barons wull bide free

Ye’ll nae fin me greetin
If Murdoch he gings bust
An aa his media empire
It finally bites the dust

The only Murdoch a div like
Is fae “Sunday Post’s” comic stuff
An aul farrant sort o bobby
He’d  hae Rupert in hauncuffs