Faar’s aa the ile siller geen?
I afen hear iss plaintive cry
Aiberdonians pyein throwe the nose
Hoose prices awa sky-high
Faar’s aa the ile siller geen?
Oor toon cooncil’s on its knees
Yet a gweed pucklie fowk ye see
Are drivin aroon in yon SUVs
Faar’s aa the ile siller geen?
Local services cryin oot in need
Aa the ile siller it seems
Gings ti satisfy shareholders greed
Faar’s aa the ile siller geen?
The social gaps nae hard ti figure
Yet bi aa reports it wid appear
Ile company profits are gettin bigger
Faar’s aa the ile siller geen?
Fit wye’s oor main street lookin dreary?
Ile companies pleadin aboot unfair tax
Is gettin a wee bit bliddy weary
Faar’s aa the ile siller geen?
Nae doot some hiv made a packet
Bit fowk nae involved in ile
Fin things agin them stackit
Faar’s aa the ile siller geen?
His there bin ony benefit at aa?
Seems ti me maist likely
It’s bin pissed up agin the wa
©Bob Smith “The Poetry Mannie” 2011