By Bob Smith.
The barn wis wash’t and scrubbit doon
A job ower hard for ae wee loon
Seen aa the fleer wis fine an clean
Ready for a dustin o slipperene
Neipers an freens fae aa aroon
Cam doon the road ti wir fairm toon
There ti hae a dunce an celebrate
The hinmaist shaif throwe the cornyaird gate
There wis streamers hingin fae the roof
As roon the fleer the fowk did hoof
Gay Gordons, waltzes and foxtrots
Maist fowk wis swatin lots an lots
Music wis provided by twa chiels
Aabody got up fer an eichtsome reel
Syne fin they needed a wee bit rest
Samplin the food they did wi zest
Pies sandwiches an scones wi jam
Teas lemonade or maybe a dram
We aa sat aroon an hid a blether
Aboot the price o coos or the affa wither
Time ti gyang hame aroon een o clock
Some fowk in the mornin wid hae ti yoke
The horse up ti the sma box cairt
Fin gaitherin neeps they micht hae ti stairt
© Bob Smith “The Poetry Mannie” 2014
Comments enabled – see comments box below. Note, all comments will be moderated.