Oct 282013
 

By Bob Smith.

manners

A think it wis Edmund Burke the 18th century statesman, author an philosopher fa said “The age o chivalry is gone. That of sophisters, economists and calculators has succeeded”.

O coorse wi aa think o chivalry as bein connectit wi knights o aulden days fa gid aboot savin fair maidens fae dragons an sic like an upholdin a quine’s honour an chastity tho’ only if the lassie wis fae the same class system as thersels.

They warna interestit in the peasant quines ither than haein them as a ‘bit on the side’. Fooiver, thingies hiv moved on a bittie sin thae days an a wid like tae think there micht be a bit o 21st century chivalry  in some o us.

A wis listenin tae a programme on the radio nae lang ago fin they teuk ess throwe-han. They war spikkin aboot chiels gien up their seat on a bus tae a wumman bodie or huddin the door open fer the female sex an wis ess noo a form o sexism. A lot o fowk hid differin opeenions wi the feminists scraichin awa aat it wis indeed sexist.

Some ither fowk thocht it wis an act o ‘chivalry’ tae gie up yer seat tae the opposite sex tho’ they widna gyaang as far as layin doon their coat or jaicket on tap o a puddle tae save a wifie’s feet gettin weet like yon Sir Walter Raleigh did wi Queen Bess. Na na the feminists war haen neen o’t.

They war weel capable o staanin on a bus or openin an waakin throwe a door thersels. A hiv tae say maist feminists, tho nae them aa, git richt up ma nib. On seein some feminists on TV a maan say they display aa the instincts o a female black widda spider.

Fit’s wrang wi gein up yer seat tae a puir quine traachlin wi a couple o geets or an auld wifie fair forfochan wi cairryin the messages? Ess wid be a chivalrous act in ma beuk tho nae doot some wid think it jist gweed mainners.

Noo masel fin a ging oot a waak wi the wife I try tae myn an bide on the kerbside o the pavemint. Ess sort o thingie his its origins awa back in the days fin gentlemen wore their swords on the left but unsheathed em wi their richt han. The ladies aye bade on the mannie’s left so he cwid draw his sword withoot her gettin in the wye. A hiv tae tell ye – a nae langer weer ma sword.

Maist war a bunch o thieving murderin cyaards

Later on in time bi bidin on the kerbside o the pavemint ess mint the mannie cwid protect his fair maiden or meybe his floosie fae the mud or dirt splashin up  fae unner the wheels o cairrages.

A hiv bin kent tae escort auld wifies fa are a bittie shoogly on their shanks across the busy streets. Feminists nae doot widna leuk upon ess as bein an act o chivalry. Wid they prefer me tae leave the puir soul tae tak her chunces wi aa the mad buggers drivin aroon in cars nooadays?

Gyaan back a fyow decades in history the knights involved in the Crusades war leukit upon as chivalrous chiels. Naething o the sort. Maist war a bunch o thieving murderin cyaards faa war only interestit in foo muckle plunder they cwid git their hans on.

The Japanese Samurai fa war the military nobility o medieval an early modern Japan  hid their ane form o chivalry ca’ed bushido fit some say dictatit aat fechtin hid tae be face tae face. Nae sneaky ambushes fae ahint rocks fer em.

Some dictionaries ca chivalry a knightly devoshun tae the service o weemin, (or wis’t a nightly devoshun tae servicin weemin), haen the inclination tae defend a weaker pairty or bein ‘gallant’.

In the 21st century a wid say the devoshun tae weemin cwid noo be describit as bein thochtfu tae the opposite sex bi offerin em yer seat fin they’re fair traachl’t an bein ‘gallant’ meanin helpin auld craiturs across the roddie.

  • Comments enabled – see comments box below. Note, all comments will be moderated.