Sep 122013

3KslimmerPicBy Bob Smith

The Triple Kirks is noo “The Pint”
The pint o’t a dinna git
As far as a can see fowks
Jist anither design fit’s shit

A “cheese grater” o ae wa’
Twa fish tanks side bi side
Tho’ the kirkie spire it seems
Is bein’ alloot tae bide

Mair office space in oor toon
Fin flats wid be mair eese
Efter 5pm an’ at wikk eyns
Human activity wull a’ cease

Affordable hooses is fit we need
Yet verra fyow cum intae bein
Fit developers class affordable
Ither fowk jist are nae seein

“The Pint” wull cum tae pass
O’ aat there’s little fear
Cos some fowk in the cooncil
Awkwird questions winna speir

A biggin wi little tae commend
Jist anither St Nicholas Hoose
In 30 years wull’t be pull’t doon
Cos it’s nae langer fit fer use?

A’ seen as farrer progress
Bit iss a jist fail tae see
Anither blicht on the skyline
In the toon twixt Don an Dee

©Bob Smith “The Poetry Mannie” 2013

  • Comments enabled – see comments box below. Note, all comments will be moderated.