The Donald’s noo bin telt
Yer advert wi div deplore
Showin some rottin win turbines
Fit warna near Scotia’s shore
The advert wis misleadin
Says fowk fae the ASA
The photo wis o turbines
In 50th state o theUSA
Noo Trumpie he protested
Sayin we telt far t’wis teen
The affa sma print in the advert
Suggestit it wisna near Aiberdeen
Na Na min said the billies
Fa look intae sic like capers
Ye shudna hae pit it in
The bliddy local papers
Dinna dare use it ony mair
Weel nae in it’s preesint form
Use photos of turbine types
Nearer tae Scotland’s norm
Noo iss begs the simple question
Fit wye the P&J printed the ad
There is advertisin standards
Tae be adhered tae in iss land
Nae doot the auld excuse
Eence mair will be trottit oot
We took the advert in good faith
An it brocht us some mair loot
So fit noo Donald we maun ask
Tae the ASA wull ye buckle?
Ye dinna like bein telt fit tae dee
An gittin rappit ower the knuckles
Iss turbines row is biggin up tae be
A fecht wi Eck, Trump’s auld bosom pal
Wull it be a showdoon at dawn
Like the “Gunfecht at the OK Corral”
©Bob Smith “The Poetry Mannie” 2012