By Bob Smith.
| Black Friday noo it wis nae fun A puir wifie trumpled on the grun Fowk ower TV sets war scrappin Cos in shops the price wis drappin . Black an blue they jostl’t an bumped Some fowk feart they micht git thumped Aa ower prices bein slashed richt doon Mayhem an madness wis aa aroon . Black Friday hordes formed a scrum As common sinse wint up the lum “Tak yer thievin hans aff aat TV set Or a bunch o fives ye’ll bliddy get” . The Black Friday idea it did start Ower in America wi yon Walmart Halloween sees pumpkins instead o neeps Anither American custom ower here creeps . Civilisation a mannie eence said Wis barbarism wi a veneer owerspread Unnerneath micht be the savage beast Unleashed tae gorge on Mammon’s feast |
We’ve noo cam tae “The Retail Season” Far fowk it seems can lose aa reason Spennin siller they simply hinna got An ither eens fair lose the plot . The festive season a like itsel Bit nae the bliddy shoppin hell On Christmas Day a’ll raise a cheer “Retail Season’s” ower fer anither eer . A “Black Friday” cam tae Glaisga toon Fin a helicopter cam richt doon Throwe a pub roof near the Clyde Fin fowk war haen a drink inside . So spare a thocht fer Glaisga noo An fer the helicopter crew Fer TV sets they’ll hae nae need As “Black Friday” saw the puir souls deid . Agin ess sad an tragic tale Materialism an sic like maan pale Next time yer spennin yer bawbees Myn life it disna growe on trees |
© Bob Smith “The Poetry Mannie” 2013
Image credit: Ian Britton – http://s3.freefoto.com/images/
Comments enabled – see comments box below. Note, all comments will be moderated.