Sep 272013

PubSigns2By Bob Smith.

Some nichtclub ainers in Aiberdeen
Are vexed an fair pit oot
Cos ae pub can open tull 3am
Takkin some o their “loot”

Mike Wilson faa ains a club or twa
Wints tae open throweoot the nicht
Sellin booze tull it dawns sax
An idea fit’s nae aat bricht

Itherwise he micht lose siller
An eyn up cryin in his beer
Anither million doon the drain
Is aat fit his ilk a’ fear?

Is the billie fer the “poors’ hoose”
If cooncil fowk ignore his plea?
Wull he hae tae shut the doors
If wi him they dinna gree?

Wull club ainers gyaang “tae the wa”
As we listen tae their tale?
Tryin tae stir up sympathee
Or is’t anither “Epic” wail?

Aiberdeen wull be an open toon
Fer binge drinkers an face bashers
If the licencin board grant his wish
They’re minus screws an washers

© Bob Smith “The Poetry Mannie” 2013

Comments enabled – see comments box below. Note, all comments will be moderated.