I dinna myn a bittie rain
It fresh’ns aathing up
A haill month’s rain in a day
Fyles noo is bein dumped
Watter rins doon the streets
Drains canna tak the strain
Ony mair sic wachty shooers
Watter’s gurglin back oot again
Flooers are lookin drookit
Heids low wi the wecht
Wi aa the watter fae the sky
The bird bath sees nae fecht
Birdies look a bit bedraiglt
They’re hidin in the trees
Waitin for the sun tae shine
An feathers dry in the breeze
Fin the sun braks throwe again
An stame rises fae the grun
Kids’ll splash throwe the puddles
They’ll be haein lots o fun
Nae doot the morn wull be fine
Birds aa wull tweet and trill
Next wikk o coorse it’ll be pissin doon
O rain maist fowk hiv hid their fill
©Bob Smith “The Poetry Mannie” 2012
Image Credit: SKY MOUNTAIN 1 © Alexandru Mitrea | Dreamstime.com