Sep 132012
 

By Bob Smith. 

Baith sides claim they are richt
Fowk snarlin’s nae a bonnie sicht
The jaw aboot UTG nivver eyns
Aneuch tae fair blaw fowk’s myns

Some cooncillors rail aboot democracy
Ithers say we’re nae gyaan tae dee
Fit business billies they did ask
The TIF scheme wis teen tae task

Politics played oot in cooncil chambers
As the local papers stoke the embers
Scottish Parlimint stick in the knife
Tae cause Labour a wee bit strife

Fit’s happenin noo is tit fer tat
Labour an SNP are haein a spat
Fowk staun aroon fair bemused
Lots o them are nae amused

Tam Smith o Acsef is diggin in
“We’ll nae gie up till we win
Tae the suit brigade jist aa kowtow
An the CGP  ye maun allow”

Awa Tam ging an bile yer heid
The Granite Web we dinna need
Tae restore city cinter tae former glory
Needs common sense nae some fairy story

Oor toon cinter wis left tae rot
Fin aa the shoppin malls we got
Raisin the gairdens winna help ae bit
City planners hiv left us in the shit

Tae bring back pride in oor city
Disna need ideas fae a Walter Mitty
Restore the fabric o oor bonnie toon
Dinna aye bliddy teer things doon

©Bob Smith “The Poetry Mannie” 2012